上網約人旅行 最怕撞正公主病同龍友 ？
發布時間： 2015/10/02 11:02
最後更新： 2015/10/02 12:06
▲ 相片來源：Pixabay
上旅遊網站，總不時見到有人招旅伴，最初唔知乜原因，後來才諗到，二人同行，無論是機票及房間開支，都有機會較一人前往便宜。
與網友或朋友旅行，如果雙方合得來，那就當然開心，但有時亦不是事事如意，就例如有網友人到機場準備入禁區，對方才通知自己病了來不到，那一刻的心情，真的猶如小丸子的畫面，暗暗的背景，一陣落葉吹過。
上到機，到達目的地，亦有可能是另一個煩惱的開始，例如出發前表示對行程無所謂，但到後又嫌三嫌四，又或者是其中一方只顧召妓，最終都是各自各玩，大家所謂的一齊去旅行，只不過是一齊坐一班機及住同一間酒店罷了，套用一個網友的經歷就是：
一齊去新加坡，check in酒店之後就冇見過佢出過房門，直至回程去機場坐的士！
那其實同陌生者去旅行，香港人最怕又係乜呢？在臉書找了些網民回應，整合以下6點，比大家參詳一下。
1. 龍友
「同行幾名龍友掛住影，話影完一齊食lunch，結果影了幾個鐘，影完急急去另一景點，說好的食lunch......唔知點解無人提，最後幾個非龍友唯有餓到入夜。」
2.公主病
「最怕同D成日要同男友恩愛的女仔朋友去旅行，全程都用電話不停打字，然後早上(編按：凌晨)2至3點先嚟打電話搞到你冇得訓......又或者係某冰天雪地的景點仲要你呆等，因為佢男友成個下晝沒搵佢，佢就一路打電話同佢男友講野就一路哭......當你之後回來香港同佢講，其實果D事可以回香港解決，旅行唔應該浪費時間，佢仲可以惡番轉頭，話你以為我故意架咩，我當時心好亂呀!」
3.旅行價值觀不同者
「懶人都係難頂，訓得晏都算，Skip早餐都算，但行兩步就要搵地方坐粒幾鐘真係Waste my time，旅行時間好寶貴，仲有就係對食冇要求既人，餐餐都係求其食個包，一係就食香港有既野，真係有冇搞錯呀，去旅行食地道野是常識吧！」
4.作息時間不同者
「生理時鐘不合，佢早起叫佢自己出去逛又唔肯，晚上我影夜景叫佢先回Hostel睡又話唔洗，結果怪我早上悶親佢晚上累著佢。」
5.準備不足的女伴
「試過同朋友去旅行，出發前提咗佢得1x度，帶衫帶外套，點知佢全部帶短袖薄T恤！叫佢係當地求其買件外套又話唔啱心水，唔肯買，但日日就"絲絲叔叔"喊住凍，成日問我點萛？真係好唔明，去5天連襪同底褲都帶唔夠，日日就為衫為底褲煩惱！」
6.謹慎理財者
「我預支出埋團友機票及酒店錢，到出發前一日佢仍冇意向埋單，一大篇藉口同其他團友講未有錢。出發後提出不夾『阿公』大數，Fine,No Problem！於是餐餐計自己Order左什麼只比個份錢，但餐餐叫團友分享食物比佢。」
作者文章資料來源：又飛啦旅人團 by flyagain.la
全文刊於Dinezz Li網誌《單身愛漫遊》，獲授權轉載。
撰文 : Dinezz Li
